可能，真係老咗

在炎熱與抑鬱的夏天，很即興地約了My Little Airport 聊天。兩年前說要在29歲穿汗衣到北極凍死，今天他們都好端端的度過了30歲生日。當初以為29歲是一條界線，但跨過了卻發現不外如是。依舊是甜甜的音樂，夭心夭肺的詞。但愛得更低迴婉轉，批判鋒芒收斂；年紀凝煉出西西弗斯式的豁達，以及九龍公園裏的自持。

聽說阿P 不喜歡做訪問，「因為我諗答案諗得好慢，詞不達意。」結果遇上我這個諗問題諗得更慢的記者，成件事變成三個人邊聽音樂邊發呆，有一搭沒一搭地聊了一小時。姑且從這場不着邊際的談話中找出幾個主題，拼湊一吓林阿P 與Nicole 最近在想什麼事。

關於封面與命題

「有人覺得這張相表達了一種感覺，個女仔好似完全活在自己的世界裏。她的打扮、房間佈局，好似自己有一套世界觀，對抗着外面的庸俗世界。」

「未試過一個封面不是我們自己影，今次是第一次用別人的相。因為先有了《香港是個大商場》這個碟名，但封面相影極都唔好，跟住索性唔乸影，在網上見到這個女仔，我就Hi 佢，問可不可以用。」「後來先知幅相內的地方是在倫敦。佢19歲，是個香港女仔，影落好多怪相。」

「今次隻碟其實同以前好唔同。頭兩隻碟好音樂性咁諗，隻碟的結構、音樂的flow 點去、快歌同慢歌的對比，第三隻碟少咗咁諗，最近兩隻碟已完全無考慮音樂。只諗主題同內容，先有了歌詞才有音樂。」

「共同點是一些小人物的生活。對比香港這個大商場內，一些小人物的生活。」P 說。

關於《九龍公園游泳池》

二百年後這裡什麼也都不是 / 宇宙裡有什麼不是暫時？

彷彿夕爺上身。但出自向來年輕又執拗的MLA 之口，格外觸動。

Nicole 說最喜歡這首。「他把demo send 給我時我人在北京，剛好想着類似的事，就比佢入到個位。」

「有無崩潰呀？」阿P 滿心期待。

「無。」Nicole 白他一眼，「日日都崩潰架啦。」

P 鍥而不捨，「有無流淚呀？ 」「無。」

「有無痛哭呀？」「無。」

「少少眼泛淚光都無呀？」「有。」「哦，咁都好啲。」P 露出狡獪又得意的笑。

兩年多前Nicole 受不了香港這個大商場，決定出走到北京。現在每日夾下Band、煮下飯、上淘寶賣vintage 手袋，「開始覺得無話邊個地方好啲。」

關於《milan》

阿P 最喜歡的是這個。

文藝少女跟中年男人講昆德拉的故事，《搭車遊戲》。好像是第一次在MLA 的情歌裏出現中年人角色。

「好少同Nicole 同步咁錄一首歌，我一路彈結他佢一路唱，平時我們都是分開錄。」

「內容呢？為咩咁喜歡？」

「點講呢？等我諗吓先。」(沉默……)「我想講啲好文藝嘅女仔到最後都係一個港女咁……」

「吓？！」

「定係你發現原來港女都有好文藝的一面？」Nicole 說。

「嗯，咁樣講好似唔係咁好……」（又沉默） 「我都唔知自己講咩。」（再沉默）

「算啦，我純粹鍾意首歌同Nicole 一齊錄，我都係表達唔到我想講嘅嘢。」「你係咪中年危機喇？」我嘀咕。「係呀，我有脫髮囉。」

「仲有咩而家？」Nicole 問。「枕住都有少少。少少囉，髮線向上，我gel 起頭之後比佢個妹話我似壽星公。」

關於愛情、性、與Terence 的心事

從前MLA 的情歌，快樂不快樂都來得純粹，失戀也都不失可愛。

這次很多三角戀、婚前婚後的掙扎，談性說愛都複雜起來。

「複雜咗？係呀，我都覺得係。」P 說。「因為老咗囉。以前無諗咁多後果。」

P 的好友Terence 快要結婚，他覺得Terence 跟未婚妻看來不投契，所以作了《你是浪子，別泊岸》，「離婚的最主因是結婚」

「Terence 發明了一種生活態度叫『肉體forever』，佢相信所有關係就算幾唔夾，只要有得搞嘢，就其他都可以解決到。」

「你肯定你想出呢段？」Nicole 提醒他。（真是好拍檔）

「我唔知呀，講咗先啦。」P 興致勃勃，「不過我後來破解咗佢個theory。我話肉體係可以forever，不過你要有不同嘅肉體先可以。」

「我和Terence 都很喜歡Jarvis Cocker 的《I never said I was deep》，我覺得我想表達嘅嘢，其實呢首歌已經講晒。」

P 說最喜歡的那句歌詞是—— No, I'm not looking for a relationship, just a willing receptacle

我多給他一次機會，「咁呢段即係出唔出得街呢？」

「我唔知呀。」P 自己同自己笑，仍陶醉在偉大的肉體forever 中。

關於窮

「好似少咗呻窮？」

「係。而家覺得窮無乜問題。」P 說，「最近有個朋友重病，我發覺賺幾多錢都無乜意思，一次重病已經可以用晒所有積蓄。這是30歲之後先識諗，其實錢唔係好重要，除咗用在健康上面。」

「用來做自己想做嘅事都好重要。」Nicole 有點不同意。

「我做自己想做嘅事用好少錢。我發覺我哋同第二啲indie band 好唔同嘅係，我哋成本好低， 唔需要用好多錢去實踐件事。」

「如果有多些錢，你會做什麼？」「如果多啲資源，我可能無乜動力去整隻碟。」竟然。

「我本身鍾意睇的都是些好無budget 的作品，無budget 先會特別多搞笑嘢。你一有製作，要配合好多嘢，有技術、有品味，才支撐到。」

「無budget，你就咁用iPhone 影住一條街，衰嘅機會係好低。但如果你有錢請個靚女返嚟，觀眾會期望有嘢發生，而結果發生唔到， 或者發生得唔自然， 就衰咗。」

「《Terence 的心事》MV 裏全都是仔，啲人投訴點解無女，話『如果全部係女就正』。後來我諗到，一個MV 如果有好多靚女，挑哪星，係好乞人憎嘅一件事。」

從《邊一個發明了返工》到《西西弗斯之歌》

有人說西西弗斯未免太阿Q，這樣想只不過是打飛機。

「我覺得是一個人世界觀的改變，不代表妥協。」

「咁諗係咪真係好過啲？」「我覺得係架。」

P 真的做過馬會兼職，在樹仁讀書的時候。

「如果那時不是這樣想，我根本捱唔到落去。我真是一個人好枯燥咁，等緊啲好衰嘅客人打比我，我先至無咁易瞓着， 先至完成到工作。」

「《邊一個發明了返工》和西西弗斯不是對立的，只是角度不同的兩種諗法。一個是要質疑工作的意義，另一個是講，當你真的什麼都改變不到的時候，你還可以改變個觀念，去令自己快樂。」

講述如何與殘酷現實共存、苦中作樂的歌還有《公司裁員三百人》和《搭的士上班去》。

沒了《瓜分林瑞麟三十萬薪金》和《donald tsang, please die》的火氣， 但《給金鐘地鐵站車廂內的人》那句「渣滓」，還是挺爽的。「我發覺好多人都會問點解今次無咗火。以前是想令人去關注某件事，但而家成個社會已經好關注，facebook 已經share 晒，我就無再用音樂去做多次。」

「同埋含蓄的作品是比較耐聽，太爆嘅嘢唔可以重複咁做。」「可能，真係老咗囉。」


《明報》- 星期日生活 - 歌舞昇平 - 2011-09-04