妹妹出櫃記

編按：香港電台第二台推出的深宵節目《自己人》，以探討同志文化和多元性向生活為主題，今年已屆5 周年。主持梁兆輝為了「以身作則、回饋聽眾」，策劃《一家人吖嘛》系列，由4 名節目主持人帶同自己家人現身說法，講述出櫃的故事。《星期日生活》將一連四周同步發放。 首集分享的是主持人阿Jean 和她的哥哥、嫂嫂。

---

客家圍村長大的兩兄妹。哥哥很疼妹妹，到哪裏都帶着她，有什麼愛好玩意兒都要跟她分享。具體表現包括，對着妹妹滔滔不絕談車經、《Touch》棒球卡通片、格鬥漫畫《北斗之拳》；學起跆拳道後，最愛捉着妹妹陪他練（其實是做沙包）。

帶着妹妹周街玩，她不小心跌到損手爛腳，又怕家人罵，哥哥忙不迭囑咐，「阿妹，唔好喊，記住點都唔好喊，如果唔係番到屋企我哋連飯都無得食架喇！」久而久之，妹妹變得好堅強，就算跌得皮破血流，總會對哥哥說，「無問題，得！」從來不哭。哥哥覺得妹妹好叻、好tough，「某程度上，係我成日當咗佢係細佬」。

妹妹說：「哥哥真係好錫我，家姐最鍾意蝦我，又唔同我玩。我梗係跟住哥哥。」

那些年，妹妹還是個會穿裙子，天真爛漫的小女孩。什麼都聽哥哥話，「佢叫我做乜，總之只要哥哥鍾意，我就好乖去做，亦唔需要問點解。佢摑我一巴我都可以『哦』咁比佢摑我一巴，真架，係真聽話。」

日子一天天過，除了哥哥，妹妹多了女同學做伴。妹妹一直讀女校，常有很多女孩子找她，本來也沒什麼。直到初中時，某個深夜家裏電話響，哥哥接聽了，對方是個女生，「佢喊晒口咁搵我妹，係好淒厲嗰隻， 『我要搵呀邊個呀…』一定非要搵到佢不可，點解有人會咁樣聲氣搵我妹？以friendship 嚟講有啲over 咗囉。」哥哥心裏開始覺得異樣。

妹妹否認自己是肇事者，「我一啲印象都無喎，嗰陣我都未拍拖」，咬定哥哥「諗錯咗」。

妹妹第一次拍拖是中四，對象是個女孩子。沒有特別經歷性取向的疑惑，純粹對身邊男生無感覺，然後到真的有感覺時就發現，「哦，嗰個係女仔喎」。但在女校的世界，這種事情很平常。

「非為他人而活」

外面的世界就不一樣。妹妹衣著愈來愈「man」，哥哥感到不對勁，多番開口干涉，「你唔好咁著得唔得呀？」，「點解你成日著成咁架？」，或者語帶嘲諷，「喂你仲型過我好多。」

妹妹不為所動，繼續酷酷的男生打扮，「點啫？總之我一定唔會著裙架喇。」兩兄妹都不願就性取向的問題好好談，吵架題材就圍着衣服轉。

哥哥很不忿，「我一直覺得我妹咁靚，好地地點解會有啲咁嘅傾向？」讀男女校的哥哥，成長中從沒遇過同性戀者，想不到第一個要面對的，便是自己最疼的妹妹。「我直情鬧佢，我心諗，『你係咪受咗乜刺激呀？定你讀女校，見人係咁你就跟風呀，你見過男人未架，你見得多可能都改觀啦。』」

平生第一次不聽哥哥話，妹妹好難過。「要同哥哥鬧交，對我嚟講係好大件事，係我難以接受嘅。」既然溝通不來，為免大家關係再惡化，妹妹寧願保持緘默。同一屋簷下，互當對方透明，「一碰到就拎轉面，兜路走。」冷戰一開，動輒兩三個月不說話。

妹妹本就長得眉清目秀，加上飽受哥哥「薰陶」成為運動健將，更是校內風頭躉。但風光背後，病痛和辛苦只有自己知。妹妹發現患上慢性的肌肉和神經性疾病，表面看起來一切完好，但日常生活有不少動作都無法自行完成，如果病情轉壞，一隻手臂更有癱瘓的危機。

於是妹妹接受了手術，手術過後與家人的關係卻變得更壞。

「以前都有掙扎過，繼續聽哥哥話啦，但講到愛，係我個人嘅感覺，無可能你叫我鍾意邊個就鍾意邊個。就算家人要反對，我都無辦法，除非我準備呢世人都要過得好唔開心。但咁難得我過到手術呢關，我更加覺得以後要生活得開心，做人唔係為其他人而活。」

而且，妹妹的病最麻煩是看上去「有手有腳、行得走得」，家人都以為做完手術就叫康復，不明白妹妹生活上還是有很多事情力不從心，還當她「詐諦」。面對家人不理解，自幼被訓練成十分忍得的妹妹，不習慣把辛苦講出口。

「直至有次我哋又嗌交，佢忍無可忍將平時啲痛苦嘢爆晒出嚟，我先知原來佢一直都suffer 緊，原來自己一路忽略咗妹妹咁多嘢。」哥哥驚覺，自己在圍村的環境下成長，其實都感染了「傳統大男人」的不少惡習，沒有設身處地為妹妹想過，有時也甚為「夾硬嚟」。

「都有諗過畀壓力佢，想將佢拗番直。」哥哥說，「我好深刻印象，有次佢幫人做model 影相，佢著咗條裙，哇，我從未見過我妹咁lady，咁正。我心裏大嘆，『咁咪幾好！』」

大男人是要靠女性溫柔感化的。哥哥認識了今天的嫂嫂，嫂嫂也是女校出身，第一眼已經知妹妹的性取向。「身邊好多朋友都係同性戀，佢哋通常特別細心、好人，我都好習慣。」知道這對兄妹鬧不和，嫂嫂總努力站在中間調解。

「哥哥係好傳統，因為佢嘅世界好少接觸呢樣嘢，但我亦見到為咗妹妹，佢真係有用心去諗，只不過需要時間。」嫂嫂笑指，兩兄妹都「好man」，好難接受跟自己意見不同的事物，但其實，兩人都是很愛惜對方的，只是不懂好好的溝通。

陪行崎嶇路

嫂嫂的調解日子有功，兩兄妹終於在長途客機上，有了機會開心見誠談一談。哥哥學會去問妹妹的感覺：「其實你點解唔愛男人呢？」也開始真正去接受事實，「佢咁聽我話都要堅持呢樣嘢，證明背後係有一個力量好大嘅原因，難道我要逼到佢去吊頸？都無意思。」

「最初好擔心爸爸媽媽點諗，亦有諗，我有個妹係TB，人哋會點睇我呢？其實好多時係放唔低自己嘅包袱，多過話為佢諗。你放得開就發覺，問題係自己製造出嚟。其實佢又唔係傷害人，唔係殺人放火，你錫個妹，應該想佢開心。」

哥哥對男女的看法本來很根深柢固，因為妹妹的不同選擇，也令他對性別定型有所反思。從前覺得「男人不可以軟弱」、「跌親唔可以喊」，自己講話大聲、硬繃繃，都認為男人這樣是理所當然；隨着認識的同性戀者愈多，相處多了，發現人家也有值得學習的地方，「個個似我咁粗枝大葉，一認為件事係咁就無彎轉，好man 好man 咁，其實會多咗好多摩擦，如果好似佢哋咁，可能個世界更加和諧。」

去年哥哥結婚了。妹妹又開始煩惱，四出蒐集朋友意見：「點算？如果我著條褲去，佢哋會唔會覺得我好唔莊重？但我無理由突然間著裙出現喎。」

結果妹妹精心挑選了一套西裝領呔現身，朋友看了Facebook 的照片，都讚她「靚仔」。最重要的是哥哥說，「見到佢做番佢自己，我就最開心最舒服。」

著裙著褲有得揀，愛男愛女就未必。妹妹感嘆，「我夠知道（異性戀）條路好易行啦，我夠想我人生係更加容易咁走過啦，有邊個唔想？但我真係鍾意唔到。」

路難行。哥哥如果疼妹妹，無論她愛誰，總該陪她走下去。


《明報》- 星期日生活 - 星期日談情 -  2011-05-15