重新學摯愛

編按：香港電台第二台推出的深宵節目《自己人》，以探討同志文化和多元性向生活為主題，今年已屆5周年。主持梁兆輝為了「以身作則、回饋聽眾」，策劃《一家人吖嘛》系列，由4名節目主持人帶同自己家人現身說法，講述出櫃的故事。《星期日生活》將一連四周同步發放。

---

Jacky 形容哥哥Sam 一向女朋友多如天上繁星，「好鹹濕！」女人湯圓、奶油皇等稱號當之無愧。

但5、6年前，哥哥行為開始有變──帶回家中的朋友由女性轉為男性，兩個人在房里，又不是打機（遊戲機在客廳），更不可能是溫書（由細到大佢都唔會溫書）。分隔兩兄弟房間的牆上有扇氣窗，傳來喁喁細語，內容似有超友誼關係，有時又會小吵小鬧。

兄弟感情深厚，一向互相關注對方的blog，Sam 寫感情事時， 代名詞由「她」轉成了「他」。直到Jacky 在哥哥的電腦里發現同性戀色情片，再也確鑿無疑。

好地地一個人，怎麼會由直變攣？最大路推斷是愛情創傷後壓力症候群，但Sam 否認，弟弟也打趣說：「我覺得佢傷害人哋多啲囉。」

欣賞細心

Sam 想來想去，也說不出特別的原因。「其實同女仔拍拖期間，身邊圈子已經有同性戀的朋友，男男女女都有，我覺得『咦，幾得意喎』。而且發現攣的朋友真的比較caring、細心，當然未必全是，但當時我身邊圈子里的都是這樣，令我覺得『其實男仔都真系幾好吖』，然後又遇到對的人，就開始咗。」

弟弟對於哥哥的「新嘗試」見怪不怪，「佢由細到大都好反叛，又曳，又成日激阿媽，讀書又唔成，成日都有好多驚人之舉，所以我見到佢轉咗口味，都無乜大反應」。

以前弟弟試過在學校里取笑「camp camp 哋」的男同學，但事情發生在哥哥身上時，又覺得不成問題。只見哥哥的衣服花款多了，更愛打扮，其他方面跟以往無大分別。

「我反而系擔心佢如何面對感情問題，因為我見到佢攣咗之後，面對的問題多咗，煩惱多咗，有時又聽見佢在房里哭。」Jacky 說。

Sam 認同，變成同性戀後愛情上的傷害是多了，可能因為拍拖的模式有所轉變。以前跟女孩子一起，當然是擔當「大男人」的角色，可是轉成了男男之愛，自己應該扮演當中的「女仔」還是「男仔」呢？

角色無分男女

「當時還是好傻咁樣，會用『男/女』的界線去分兩個男仔。會諗，對方個人好man 喎，咁我是否應站在一個比較女性的position 去跟他相處？點知人哋會嫌我黐身，話『我無要過你做呢啲嘢喎』。又試過，當情人節想去約對方，人哋會話『咁古怪』、『周街都系人喎』，咁我又好疑惑，原來跟男仔拍拖唔可以咁？唔會做呢啲嘢架？」

一切相處之道要從頭學起。究竟應如何跟一個同性談戀愛？主流文化里的劇集、小說，以至身邊朋友都是異性戀當道，不能提供參考範例。

Sam 時有疑惑，竟求教於前度女友。「系架，佢哋好多而家仍是我best friend。」Sam 說，知道他變攣了，前女友開始時都有點驚訝，會問「那是否等於你以前都無愛過我呢？」，「但我會答佢，唔可以用而家去衡量已經發生了的愛情，我愛佢在當時嗰刻是真的。而她們都是些好好的人，好open 的女仔，所以也覺得沒什麼。」

雖然在適應上有困難，但Sam 沒打算要再變回直男。「始終我覺得跟男仔相處比同女仔舒服，我喜歡那種好buddies 的形式，多過好傳統的兩性關係。男仔喜好、諗嘢方式接近些，大家真系share 到個life，事業上，大家選擇乜時期搏殺、乜時期settle，亦都會夾啲。」

Sam 說由始至終都沒準備對弟弟隱瞞，連色情片也放在電腦desktop。但對媽媽，就要三思而後行。他形容，成長時期爸爸長期不在家，媽媽要母兼父職，是個好叻、好tough 的女人，有什麼大事和煩惱也只會埋首工作，不會說出來；平時母子相處是很朋輩式的，「每逢我做錯事就特別sweet 咁氹人，我媽總會『做乜呀？ 扮friend呀？』一下就令我shut up。」

「我本來打算，好似細個想去夜街咁，初初佢肯定話唔畀，你唔聽，去下去下就會由得你，我諗都可以用同樣方式。」Sam 偷笑著說。

愛屋及烏

終於有一晚Jacky 就接到哥哥的「求救」電話，「我同媽咪講咗，你幫我睇住佢，睇下阿媽點啦」。因為媽媽反應好愕然，Sam 擔心，媽媽收在心裡不開心，自己又是肇事者，不便開解。Jacky 問媽媽怎樣，媽媽只說「得啦，無嘢啦，返嚟先講」，看上去似乎真的沒什麼。不過Sam 也感覺到媽媽有段時間是不懂如何去接受，連吃早餐碰到面都支吾以對，一反平日的豪氣。大約過了一個月，媽媽才回複常態。

「其實無嘢改變架，我還是一樣的我，佢都慢慢明白，其實相處上無需要變，日常生活『咪又系咁』。」後來Sam 到電台主持同性戀話題節目，媽媽也有收聽。

最近一班同性戀朋友，有男有女，開派對前湧到Sam 家裡打扮，Sam 說要怎樣怎樣拔眉、gel頭、穿什麼衣服，媽媽都參與一份，還幫手替他的朋友化妝，興致勃勃地跟年輕朋友呻， 「這支明明是我的，Sam 又拿了去用，用光了還叫我去買！」朋友都贊她是「潮媽」。

「我真的沒想過，我媽咪愛我到一個地步，系會愛埋我身邊嘅朋友。」說到這里，Sam 開始眼泛淚光： 「我知道無論我性向又好、職業又好，作為一個兒子都好任性地選了一條比較難行的路，我好多謝屋企人，無在這途中打擊我，或者提出任何疑問，默默地包容曬我所有嘅任性，咁信任我、咁錫我。」

弟弟認為，「同性戀對佢嚟講系咁深層的身分問題，他都不怕尷尬拎出嚟跟我講，我覺得更加要支持佢，佢變攣之後，其實我哋仲close 咗。」總括變攣的經驗，Sam 覺得，「性向並不是與生俱來，一個人生出嚟，佢可以系直，可以系攣，異性戀嘅concept，何嘗唔系個社會培養出嚟？」

哥哥突然變攣，大家「同一個阿媽生」，細佬可會擔心自己步其後塵？ 「完全無諗過呢樣嘢喎，我好鍾意女人架，你放心！」（望著旁邊的靚靚女朋友說）


《明報》 - 星期日生活 - 星期日談情 - 2011-05-22